Eldbökuð pizza með eplum og sítrónuolíu

Leiðbeiningar

• Setjið helminginn af volga vatninu í stóra skál ásamt olíu og salti.
• Setjið hinn helminginn af volga vatninu í glas og blandið þurrgeri út í. Látið standa þar til gerið fer að freyða aðeins. Þetta getur tekið u.þ.b. 10 mínútur.
• Blandið öllu saman í stóru skálina og hnoðið deigið upp í kúlu. Bætið við hveiti ef þarf. Það má hnoða deigið í hrærivél en ég hnoða það oftast í höndunum.
• Breiðið yfir skálina og leyfið deiginu að hefast á heitum stað í 2 klukkutíma eða þar til það hefur u.þ.b. tvöfaldast að stærð.
• Ef verið er að gera meira eina pizzu er deiginu núna skipt upp í eins marga hluta og pizzurnar eru og mótaðar kúlur.
• Leggið kúlurnar á bakka, breiðið yfir og leyfið að hefjast í u.þ.b. 20 mínútur.
• Fletjið út pizzadeig á góðu bretti (eða togið og snúið í loftinu ef þið getið). Áður en olía og álegg er sett ofan á er mikilvægt að vera viss um að deigið festist ekki við brettið. Hér getur þurft að bæta smá hveiti á botninn og snúa honum við á brettinu. Það þarf að vera hægt að hreyfa botninn auðveldlega á brettinu svo hægt sé að ná pizzunni af brettinu með pizzaspaða og skutla inn í eldofninn.
• Setjið sítrónuolíu beint á botninn.
• Setjið helming rifna ostsins næst.
• Raðið þunnum eplasneiðum, gráðosti, mozzarellaosti og döðlum ofan á.
• Rífið sítrónubörk (ysta lagið) yfir.
• Stráið restinni af rifna ostinum yfir.
• Bakið í eldofni sem náð hefur 400°C í u.þ.b. 1 mínútu. Bakið fyrst í 25 sek, takið pizzuna út, snúið í 180° og bakið í 15 sek, snúið svo í 90° og bakið í 15 sek, snúið svo að síðustu í 180° og bakið í 15 sek. Þannig tekur rúmlega mínútu að eldbaka pizzu í góðum eldofni. Sjá nánar í myndbandi.
• Skerið og skutlið ristuðum furuhnetum yfir.